al-Mursalat - Yoruba:Mikail

77:1 Allāhu fi àwọn atẹ́gùn tó ń sáré ní tẹ̀léǹtẹ̀lé búra.

77:2 Ó fi àwọn ìjì atẹ́gùn tó ń jà búra.

77:3 Ó fi àwọn atẹ́gùn tó ń tú èṣújò ká búra.

77:4 Ó fi àwọn tó ń ṣèpínyà láààrin òdodo àti irọ́ búra.

77:5 Ó fi àwọn mọlāika tó ń mú ìrántí wá (bá àwọn Òjíṣẹ́) búra.

77:6 (Ìrántí náà jẹ́) àwíjàre tàbí ìkìlọ̀.

77:7 Dájúdájú ohun tí A ṣe ní àdéhùn fún yín kúkú máa ṣẹlẹ̀.

77:8 Nítorí náà, nígbà tí wọ́n bá pa (ìmọ́lẹ̀) ìràwọ̀ rẹ́,

77:9 àti nígbà tí wọ́n bá ṣí sánmọ̀ sílẹ̀ gbagada,

77:10 àti nígbà tí wọ́n bá ku àwọn àpáta dànù,

77:11 àti nígbà tí wọ́n bá fún àwọn Òjíṣẹ́ ní àsìkò láti kójọ (pẹ̀lú ìjọ wọn),

77:12 ọjọ́ wo ni wọ́n so (àwọn ìṣẹ̀lẹ̀ wọ̀nyí) rọ̀ fún ná?

77:13 Fún ọjọ́ ìpínyà (láààrin àwọn ẹ̀dá) ni.

77:14 Kí sì ni ó mú ọ mọ ohun tó ń jẹ́ Ọjọ́ ìpínyà?

77:15 Ègbé ni ní ọjọ́ yẹn fún àwọn olùpe-òdodo-nírọ́.

77:16 Ǹjẹ́ Àwa kò ti pa àwọn ẹni àkọ́kọ́ rẹ́ bí?

77:17 Lẹ́yìn náà, A sì máa fi àwọn ẹni Ìkẹ́yìn tẹ̀lé wọn (nínú ìparun).

77:18 Báyẹn ni A ó ti ṣe pẹ̀lú àwọn ẹlẹ́ṣẹ̀.

77:19 Ègbé ni ní ọjọ́ yẹn fún àwọn olùpe-òdodo-nírọ́.

77:20 Ṣé A kò ṣẹ̀dá yin láti inú omi lílẹ yẹpẹrẹ bí?

77:21 Lẹ́yìn náà, A fi sínú àyè ààbò (ìyẹn, ilé-ọmọ)

77:22 títí di gbèdéke àkókò kan tí A ti mọ̀ (ìyen, ọjọ́ ìbímọ).

77:23 A sì ní ìkápá àti àyànmọ́ (lórí rẹ̀. Àwa sì ni) Olùkápá àti Olùpèbùbù ẹ̀dá tó dára.

77:24 Ègbé ni ní ọjọ́ yẹn fún àwọn olùpe-òdodo-nírọ́.

77:25 Ǹjẹ́ Àwa kò ṣe ilẹ̀ ní ohun tó ń kó ẹ̀dá jọ mọ́ra wọn;

77:26 (ìyẹn) àwọn alààyè àti àwọn òkú?

77:27 A sì fi àwọn àpáta gbagidi gíga-gíga sínú rẹ̀. A sì fún yín ní omi dídùn mu.

77:28 Ègbé ni ní ọjọ́ yẹn fún àwọn olùpe-òdodo-nírọ́.

77:29 Ẹ máa lọ sí ibi tí ẹ̀ ń pè ní irọ́.

77:30 Ẹ máa lọ sí ibi èéfín ẹlẹ́ka mẹ́ta.

77:31 Kì í ṣe ibòji tútù. Kò sì níí rọ̀ wọ́n lọ́rọ̀ nínú ìjòfòfò Iná.

77:32 Dájúdájú (Iná náà) yóò máa ju ẹ̀tapàrà (rẹ̀ sókè tó máa dà) bí pẹ̀tẹ́ẹ̀sì.

77:33 (Ó máa dà) bí àwọn ràkúnmí aláwọ̀ omi ọsàn.

77:34 Ègbé ni ní ọjọ́ yẹn fún àwọn olùpe-òdodo-nírọ́

77:35 Èyí ni ọjọ́ tí wọn kò níí sọ̀rọ̀.

77:36 A kò sì níí yọ̀ǹda (ọ̀rọ̀ sísọ) fún wọn, áḿbọ̀sìbọ́sí pé wọ́n yóò mú àwáwí wá.

77:37 Ègbé ni ní ọjọ́ yẹn fún àwọn olùpe-òdodo-nírọ́.

77:38 Èyí ni ọjọ́ ìpínyà. Àwa yó sì kó ẹ̀yin àti àwọn ẹni àkọ́kọ́ jọ.

77:39 Tí ẹ bá ní ète kan lọ́wọ́, ẹ déte sí Mi wò.

77:40 Ègbé ni ní ọjọ́ yẹn fún àwọn olùpe-òdodo-nírọ́.

77:41 Dájúdájú àwọn olùbẹ̀rù Allāhu yóò wà níbi ibòji àti àwọn omi ìṣẹ́lẹ̀rú,

77:42 àti àwọn èso èyí tí wọ́n bá ń fẹ́.

77:43 Ẹ jẹ, kí ẹ sì mu pẹ̀lú ìgbádùn nítorí ohun tí ẹ̀ ń ṣe níṣẹ́.

77:44 Dájúdájú báyẹn ni Àwa ṣe ń san àwọn olùṣe-rere ní ẹ̀san (rere).

77:45 Ègbé ni ní ọjọ́ yẹn fún àwọn olùpe-òdodo-nírọ́.

77:46 Ẹ jẹ, kí ẹ sì gbádùn fún ìgbà díẹ̀. Dájúdájú ẹlẹ́ṣẹ̀ ni yín.

77:47 Ègbé ni ní ọjọ́ yẹn fún àwọn olùpe-òdodo-nírọ́.

77:48 Nígbà tí wọ́n bá sọ fún wọn pé kí wọ́n kírun, wọn kò níí kírun.

77:49 Ègbé ni ní ọjọ́ yẹn fún àwọn olùpe-òdodo-nírọ́.

77:50 Nígbà náà, ọ̀rọ̀ wo ni wọn yóò gbàgbọ́ lẹ́yìn rẹ̀?[1]

al-Mursalat (المُرْسَلَات)

Yoruba:Mikail - Yoruba:Mikail