an-Naba` (النَّبَأ)

Yoruba:Mikail - Yoruba:Mikail

Chapter 78 • 40 verses • Meccan

← Previous Chapter Next Chapter →

78:1 Nípa kí ni wọ́n ń bíra wọn léèrè ná?

78:2 Nípa ìró ìkọ̀kọ̀ ńlá ni,

78:3 èyí tí wọ́n ń yapa-ẹnu lórí rẹ̀.

78:4 Rárá! Wọ́n ń bọ̀ wá mọ̀.

78:5 Lẹ́yìn náà, rárá sẹ́, wọ́n ń bọ̀ wá mọ̀.

78:6 Ǹjẹ́ Àwa kò ṣe ilẹ̀ ní ìtẹ́ bí,

78:7 àti àwọn àpáta ní èèkàn (fún ilẹ̀)?

78:8 A sì ṣẹ̀dá yín ní oríṣiríṣi (akọ àti abo).

78:9 A ṣe oorun yín ní ìsinmi.

78:10 A tún ṣe alẹ́ ní ìbora.

78:11 A tún ṣe ọ̀sán ní (àsìkò fún) wíwá ìjẹ-ìmu.

78:12 A tún mọ sánmọ̀ méje tó lágbára sókè yín.

78:13 A tún ṣe òòrùn ní ìmọ́lẹ̀ tó ń tàn gbòlà.

78:14 Àti pé A sọ omi tó ń bọ́ tẹ̀léra wọn kalẹ̀ láti inú àwọn ẹ̀ṣújò

78:15 nítorí kí Á lè fi mú kóró èso àti irúgbìn jáde

78:16 pẹ̀lú àwọn ọgbà tó kún digbí fún n̄ǹkan oko.

78:17 Dájúdájú ọjọ́ ìpínyà, ó ní gbèdéke àkókò kan.

78:18 (Ìyẹn ni) ọjọ́ tí wọ́n á fọn fèrè oníwo fún àjíǹde. Ẹ̀yin yó sì máa wá níjọ-níjọ.

78:19 Wọ́n sì máa ṣí sánmọ̀ sílẹ̀. Ó sì máa di àwọn ìlẹ̀kùn.

78:20 Wọ́n máa mú àwọn àpáta rìn (bọ́ sí àyè mìíràn). Ó sì máa di ahúnpeéná.

78:21 Dájúdájú iná Jahanamọ, ó lúgọ sílẹ̀ lójú ọ̀nà.

78:22 (Ó jẹ́) ibùgbé fún àwọn alákọyọ.

78:23 Wọn yóò máa gbé inú rẹ̀ fún ìgbà gbọọrọ.

78:24 Wọn kò níí rí ìtura tàbí ohun mímu kan tọ́wò nínú rẹ̀,

78:25 àyàfi omi tó gbóná parí àti àwọnúwẹ̀jẹ̀.

78:26 (Ó jẹ́) ẹ̀san tó ṣe wẹ́kú (iṣẹ́ wọn).

78:27 Dájúdájú wọn kì í retí ìṣírò-iṣẹ́.

78:28 Wọ́n sì pe àwọn āyah Wa ní irọ́ gan-an.

78:29 Gbogbo n̄ǹkan sì ni A ti ṣe àkọsílẹ̀ rẹ̀ sínú Tírà kan.

78:30 Nítorí náà, ẹ tọ́ (ìyà) wò. A ò sì níí ṣe àlékún kan fún yín bí kò ṣe ìyà.

78:31 Dájúdájú ìgbàlà wà fún àwọn olùbẹ̀rù (Allāhu).

78:32 Àwọn ọgbà oko àti èso àjàrà,

78:33 àti àwọn ọlọ́mọge, tí wọn kò júra wọn lọ lọ́jọ́-orí,

78:34 àti ife ọtí tó kún dẹnu (ni ẹ̀san wọn).

78:35 Wọn kò níí gbọ́ ìsọkúsọ àti ọ̀rọ̀ irọ́ nínú rẹ̀.

78:36 (Ó jẹ́) ẹ̀san láti ọ̀dọ̀ Olúwa rẹ, (ó sì jẹ́) ọrẹ ní ìbámu sí ìṣírò-iṣẹ́ (wọn).

78:37 (Ẹsan náà wá láti ọ̀dọ̀) Olúwa àwọn sánmọ̀, ilẹ̀ àti ohun tó wà láààrin méjèèjì, Àjọkẹ́-ayé. Wọn kò sì ní ìkápá ọ̀rọ̀ lọ́dọ̀ Rẹ̀.

78:38 Ọjọ́ tí mọlāika Jibrīl àti àwọn mọlāika (mìíràn) yóò dúró ní ọ̀wọ̀ọ̀wọ́. Wọn kò sì níí sọ̀rọ̀ àfi ẹni tí Àjọké-ayé bá yọ̀ǹda fún. Onítọ̀ún sì máa sọ̀rọ̀ tó máa ṣe wẹ́kú.

78:39 Ìyẹn ni ọjọ́ òdodo. Nítorí náà, ẹni tí ó bá fẹ́ kí ó mú ọ̀nà tó máa gbà ṣẹ́rí padà sí ọ̀dọ̀ Olúwa rẹ̀ pọ̀n (ní ti ìronúpìwàdà).

78:40 Dájúdájú A fi ìyà tó súnmọ́ ṣe ìkìlọ̀ fún yín. Ọjọ́ tí ènìyàn yóò máa wo ohun tí ó tì síwájú, aláìgbàgbọ́ yó sì wí pé: “Yéè, èmi ìbá sì jẹ́ erùpẹ̀, (èmi ìbá là nínú ìyà).”