87:1
(اي پيغمبر!) اُنھيءَ پنھنجي تمام مٿاھين پالڻھار جي نالي جي پاڪائي بيان ڪر
87:2
جنھن (ساريءَ مخلوقات کي) خلقيو، پوءِ سنئين لڱين ڪيائين
87:3
۽ جنھن اندازو ڪيو، پوءِ سڌو رستو ڏيکاريائين
87:4
۽ جنھن تازو گاھ ڄمايو
87:5
پوءِ اُن کي سُڪو سڙيو ڪيائين
87:6
اسين تو کي (قرآن) پاڙھينداسون، پوءِ نہ وساريندين
87:7
مگر جيڪي الله گھريو آھي، بيشڪ اُھو ظاھر کي ڄاڻندو آھي ۽ جيڪي ڳُجھو آھي، تنھن کي (بہ)
87:8
۽ (نجات جو) آسان رستو تو کي سھنجو ڪري ڏينداسين
87:9
پوءِ جيڪڏھن نصيحت ڏيڻ فائدو ڪري تہ نصيحت ڪر
87:10
جيڪو ڊڄندو سو سُتت سمجھ وٺندو
87:11
۽ اُن (نصيحت وٺڻ) کان (اُھو) تمام نڀاڳو پاسو ڪندو
87:12
جو وڏيءَ باھ ۾ گھڙندو
87:13
وري نڪي اُتي مرندو ۽ نڪي جيئرو رھندو
87:14
بيشڪ اُھو ڪامياب ٿيو جيڪو سڌريو
87:15
۽ پڻ پنھنجي پالڻھار جو نالو ياد ڪري نماز پڙھندو رھيو
87:16
بلڪ دُنيا جي حياتيءَ کي (آخرت کان) پسند ڪندا آھيو
87:17
۽ (حقيقت ڪري) آخرت ڀَلي آھي ۽ ھميشہ رھڻ واري آھي
87:18
بيشڪ ھيءُ (بيان) پھرين صحيفن ۾ (بہ لکيل) آھي
87:19
جي صحيفا ابراھيم ۽ موسىٰ جا آھن