al-Buruj - Yoruba:Mikail

85:1 (Allāhu) fi sánmọ̀ tí àwọn ibùsọ̀ (òòrùn, òṣùpá àti àwọn ìràwọ̀) wà nínú rẹ̀ búra.

85:2 Ó tún fi ọjọ́ tí wọ́n ṣe ní àdéhùn (ìyẹn Ọjọ́ Àjíǹde) búra.

85:3 Ó tún fi olùjẹ́rìí àti ohun tó jẹ́rìí sí búra.

85:4 A ṣẹ́bi lé àwọn tó gbẹ́ kòtò (iná),

85:5 (ìyẹn) iná tí wọ́n ń fi igi kò (nínú kòtò).

85:6 (Rántí) nígbà tí wọ́n jókòó sí ìtòsí rẹ̀.

85:7 Wọ́n sì ń wo ohun tí wọ́n ń ṣe fún àwọn onígbàgbọ́ òdodo.

85:8 Wọn kò rí àlèébù kan (wọn kò sì kórira kiní kan) lára wọn bí kò ṣe pé, wọ́n ní ìgbàgbọ́ òdodo nínú Allāhu, Alágbára, Ẹlẹ́yìn,

85:9 Ẹni tí Ó ni ìjọba àwọn sánmọ̀ àti ilẹ̀. Allāhu sì ni Ẹlẹ́rìí lórí gbogbo n̄ǹkan.

85:10 Dájúdájú àwọn tó fi ìnira kan àwọn onígbàgbọ́ òdodo lọ́kùnrin àti àwọn onígbàgbọ́ òdodo lóbìnrin, lẹ́yìn náà tí wọn kò ronú pìwàdà, ìyà iná Jahanamọ ń bẹ fún wọn. Ìyà iná tó ń jó sì wà fún wọn.

85:11 Dájúdájú àwọn tó gbàgbọ́ ní òdodo, tí wọ́n sì ṣe àwọn iṣẹ́ rere, tiwọn ni àwọn Ọgbà Ìdẹ̀ra kan, tí àwọn odò ń ṣàn ní ìsàlẹ̀ rẹ̀. Ìyẹn sì ni èrèǹjẹ ńlá.

85:12 Dájúdájú ìgbámú ti Olúwa rẹ mà le.

85:13 Dájúdájú Òun ni Ó pìlẹ̀ (ẹ̀dá), Ó sì máa dá (ẹ̀dá) padà (fún àjíǹde).

85:14 Òun ni Aláforíjìn, Olólùfẹ́ (ẹ̀dá),

85:15 Òun l’Ó ni Ìtẹ́-ọlá, Ológo (Ẹni-ọ̀wọ̀ jùlọ),

85:16 Olùṣe-ohun-t’Ó-bá-fẹ́.

85:17 Ṣebí ìró àwọn ọmọ ogun ti dé ọ̀dọ̀ rẹ,

85:18 (ọmọ ogun) Fir‘aon àti (ìjọ) Thamūd?

85:19 Síbẹ̀síbẹ̀ àwọn tó ṣàì gbàgbọ́ sì ń pe òdodo ní irọ́.

85:20 Allāhu sì yí wọn ká lẹ́yìn wọn.

85:21 Àmọ́ sá, ohun (tí A fi ránṣẹ́ sí ọ ni) al-Ƙur’ān alápọ̀n-ọ́nlé,

85:22 tí ó wà nínú wàláà tí wọ́n ń ṣọ́.

al-Buruj (البُرُوج)

Yoruba:Mikail - Yoruba:Mikail