al-Balad - Yoruba:Mikail

90:1 Èmi (Allāhu) ń fi ìlú yìí[1] búra.

90:2 Ìwọ sì ní ẹ̀tọ́ sí ìlú yìí (láti jagun nínú rẹ̀).[1]

90:3 Èmi (Allāhu) ń fi òbí àti ohun tó bí búra.

90:4 Dájúdájú A ṣẹ̀dá ènìyàn sínú ìṣòro.

90:5 Ṣé ó ń lérò pé ẹnì kan kò ní agbára lórí òun ni?

90:6 Ó (sì) ń wí pé: “Èmi ti bàná dúkìá ọ̀pọ̀lọ́pọ̀ (láti fi tako Ànábì - kí ìkẹ́ àti ọlà Allāhu máa bá a -)”

90:7 Ṣé ó ń lérò pé ẹnì kan kò rí òun ni?

90:8 Ṣé A kò ṣe ojú méjì fún un?

90:9 Àti ahọ́n pẹ̀lú ètè méjì (tí A ṣe fún un)?

90:10 A sì fi ọ̀nà méjì mọ̀ ọ́n.

90:11 Kò sì lọ rin ojú-ọ̀nà orí àpáta tó ṣòroó gùn fún ìgbàlà ẹ̀mí níbi Iná!

90:12 Kí sì ni ó mú ọ mọ ohun tó ń jẹ́ ojú-ọ̀nà orí àpáta tó ṣòroó gùn fún ìgbàlà ẹ̀mí?

90:13 (Òhun ni) títú ẹrú sílẹ̀ lóko ẹrú.

90:14 Tàbí fífún ènìyàn ní oúnjẹ ní ọjọ́ ebi.

90:15 (Ẹ lè fún) ọmọ-òrukàn nínú ẹbí,

90:16 tàbí mẹ̀kúnnù tí kò ní gá tí kò ní go (olòṣì paraku).

90:17 Lẹ́yìn náà, kí ó wà nínú àwọn tó gbàgbọ́ ní òdodo, tí wọ́n ń gbara wọn níyànjú sùúrù ṣíṣe, tí wọ́n sì tún ń gbara wọn níyànjú àánú ṣíṣe.

90:18 Àwọn wọ̀nyẹn ni èrò ọwọ́ ọ̀tún.

90:19 Àwọn tó sì ṣàì gbàgbọ́ nínú àwọn āyah Wa, àwọn ni èrò ọwọ́ òsì.[1]

90:20 Wọ́n máa ti àwọn ìlẹ̀kùn Iná pa mọ́ wọn lórí pátápátá.

al-Balad (البَلَد)

Yoruba:Mikail - Yoruba:Mikail